2Ki 20 | MEU | STEP | Unu dinadia ai Hesekia na e gorerea, mokona e mase. Bena peroveta tauna Isaia Amoso na dekena ema, e hereva henia, eto, Iehova na ini e gwau tomamu: Emu ḡau iboudiai bavatodia ḡoevaḡoeva, badina be oi na ba mase, emu gorere amo basio namo lou.

2 Kings 20

Hesekia e gorerea

1 Unu dinadia ai Hesekia na e gorerea, mokona e mase. Bena peroveta tauna Isaia Amoso na dekena ema, e hereva henia, eto, Iehova na ini e gwau tomamu: Emu ḡau iboudiai bavatodia ḡoevaḡoeva, badina be oi na ba mase, emu gorere amo basio namo lou. 2 Bena Hesekia vairana na haba e henia, bona Iehova e ḡuria, eto, 3 Iehova e, na noimumu ba laloa tao, lau na oi vairamu ai vada na raka mai heabidadamagu bona mai lalogu idoinai ida, bona oi vairamu ai vada na kara maoromaoro. Bena Hesekia na e tai dikadika.

4 Isaia na bogaragi maḡuna amo do se raka lasi ai, Iehova ena hereva na ienai e kau, eto, 5 A lou lao, Hesekia, egu bese lohiana, ba hamaoroa, baoto, Iehova, senemu David ena Dirava, na ini e gwau tomamu: Emu ḡuriḡuri vada na kamonai, bona iruru-matamu vada na ita. A kamonai, do baina hamaurimu; dina ihatoina ai Iehova ena dubu ai ba dae kau. 6 Emu mauri na ma baina hadaudaua laḡani gwauta-ima. Oi bona ina hanua na Asuria pavapavana imana amo baina harohomui mauri, bona ina hanua baina gimaia, lau sibogu daigu ai bona egu hesiai tauna David dainai. 7 Bena Isaia eto, Suke mane ta a mailaia; bae abia, iohururu ai bae atoa kau, bena baine namo lou.

8 Bena Hesekia ese Isaia e hereva henia, eto, Iehova ese baine hamaurigu bena dina ihatoina ai Iehova ena dubu ai baina dae kau toana be dahaka? 9 Bena Isaia eto, Emu toa binai Iehova ena amo, Iehova ese vada e gwauraia ḡauna na baine karaia: ikerukeru na vadavada gwauta ma baine ha-ikerukerudia, eiava baine lou, vadavada gwauta ma bae diari? 10 Hesekia na e haere, eto, Ikerukeru baine lata na ḡau haraḡana, a ikerukeru na vadavada gwauta amo baine lou be namo. 11 Bena peroveta tauna Isaia ese Iehova e tai henia; bena Iehova ese ikerukeru na vadavada gwauta amo e haloua, dina gelona ai Ahasa ena dina-hahetohona ḡauna ai vada e ikerukeru gaudia.

Gwau-kau taudia Babulono amo

12 Una negana ai Merodak-baladan, Babulono pavapavana Baladan natuna, ese gwaukau taudia haida e siaidia, revareva bona herahia ḡauna na Hesekia dekena bae laohai; badina be ia e kamonai Hesekia vada e gorerea. 13 Bena Hesekia ese e abidia dae, ena kohu namo-hereadia e habouva rumana idoinai na e haheitalaidia,silver ,gold , muramura mai bonadia, dehoro namo-hereana, ena tuari ḡaudia, bona ḡau iboudiai ena habou-habou rumadia ai mimia; asi ḡauna ta ena ruma ai eiava ena tano ai Hesekia ese se haheitalaidia.

14 Bena peroveta tauna Isaia na King Hesekia dekena ema, e nanadaia, eto, Unu tatau na dahaka e gwaurai? Bona ede amo oi dekemu ema? Hesekia eto, Gabu daudau amo vada ema, Babulono amo. 15 Isaia ma eto, Oiemu ruma ai dahaka dahaka e ita? Hesekia ma e haere, eto, Ḡau iboudiai egu ruma ai na vada e itadia; asi ḡauna ta egu habou-habou rumadia ai lau ese asina haheitalaidia.

16 Bena Isaia ese Hesekia e hamaoroa, eto, Iehova ena hereva a kamonai: 17 Dinadia vada e maimu, emu ruma kohudia iboudiai, senemu ese vada e haboudia ema bona hari dina, na Babulono bae laohaidia; ḡau ta basine mia. Iehova e gwaumu. 18 Bona oi natumu haida, oi ese o havaradia memerodia, na bae laohaidia; idia na hesiai taudia ai baela, Babulono pavapavana ena ruma ai. 19 Bena Hesekia ese Isaia e hamaoroa, eto, Iehova ena hereva oi ese vada o gwauraia na hereva namona. Badina be Hesekia na ini e helalo toma, eto, Herevana, lauegu dina lalodiai maino bona noho-namo bae mia.

King Hesekia e mase

20 Hesekia ena kara oredia, bona ena goada sivaraidia, bona gohu bona dadaira e karadia, ranu na e mailaia hanua lalonai, sivaraina, na Iuda Pavapavadia Sisigadia Bukana ai vada e hetore, ani? 21 Bena Hesekia na tubu tama dekediai e mahuta; bona ia natuna Manase na ia gabuna ai e lohia.